Eusko Jaurlaritzak proiektu bateratuetarako emandako laguntzei esker, 2021eko abenduaren 1etik aurrera Iñaki Alberdiren Digital Music Room estreinatuko dugu. Emanaldi-areto honetan, bere webgunetik bertatik, Iñaki Alberdi Music Project-en bideoak ikusi ahal izango dira, esklusiban. Zuzeneko emanaldiaren berotasuna eta emozioa birsortzea da aretoko lehengaia.

Iñaki Alberdi Music Project garapen eta esperimentaziorako gunea da, eta helburua akordeoiaren inguruko kontzeptu instrumentalak, interpretaziozkoak edo eszenikoak berrikustea da. Tradizio eta publiko askotatik hurbil dagoen tresna da, baina alderdi askotan ere ez da ezagutzen, eta, horregatik, etengabe birpentsatu behar du musikaren barruan duen lekua.

IAMPek aldaketa, berritasuna, pedagogia, hurbileko musika esperimentalak eta gizarte kulturaniztun baten soinu-irudikapena eskaintzen ditu, bai kontzertu-aretoetan, bai espazio alternatiboetan.